Milli çempionat bərpa olunur
Azərbaycanın milli futbol çempionatı iyunun 21-dən bərpa olunur. Novator.az xəbər verir ki, qərar Klublar Komitəsi, AFFA və Professional Futbol Liqası rəsmilərinin 31 may iclasında qəbul edilib. Bütün oyunlar tamaşaçısız keçiriləcək.
2019-2020 mövsümü koronavirus pandemiyasına görə mart ayının ortalarında dayandırılıb.
Novator.az bildirir ki, yüksək liqada oynanmamış 8 tur qalır. 20 turdan sonra “Qarabağ” komandası 45 xalla liderlik edir. “Neftçi” 37 xalla ikinci, “Keşlə” 30 xalla üçüncü pillədədir.
“Sumqayıt”la “Zirə”nin 23, “Sabah”ın 21, “Səbail”in 20, “Qəbələ”nin 19 xalı var.
İlk çempionatın keçirildiyi 1992-ci ildən bəri 8 dəfə “Neftçi”, 7 dəfə “Qarabağ”, 3 dəfə “Kəpəz”, 2 dəfə “Şəmkir”, 2 dəfə “Bakı”, 2 dəfə “İnter”, 1 dəfə “Turan”, 1 dəfə “Xəzər Lənkəran” çempion olub.
