Naxçıvana baş nazir təyin edilib
Mayın 23-də Naxçıvan Muxtar Respublikası Ali Məclisinin sessiyası keçirilib. AZƏRTAC-ın məlumatına görə, Azərbaycan prezidenti İlham Əliyevin təqdimatına baxılan sessiyada Səbuhi Hidayət oğlu Məmmədov Naxçıvan Muxtar Respublikasının baş naziri təyin edilib.
Səbuhi Məmmədov 1 may 1969-cu ildə Şərur rayonunun İbadulla kəndində doğulub. Azərbaycan Kənd Təsərrüfatı Akademiyasının iqtisad fakültəsini bitirib.
Mərkəzi Bankın Naxçıvan Muxtar Respublikası İdarəsinin sədri vəzifəsində çalışıb. Son təyinata qədər Naxçıvan Muxtar Respublikası baş nazirinin müavini-maliyyə naziri olub.
Əvvəlki baş nazir Əlövsət Baxşıyev mayın 14-də vəzifədən çıxarılıb. O, 2000-ci il fevralın 11-dən Naxçıvan hökumətinə rəhbərlik edirdi.
Novator.az bildirir ki, Naxçıvan Muxtar Respublikasının ali vəzifəli şəxsi Ali Məclisin sədridir. 1995-ci ildən bu postu Vasif Talıbov tutur, həm qanunvericilik, həm icra hakimiyyəti sahələrində səlahiyyətlər həyata keçirir.
Ali Məclis majoritar sistemlə (dairələrdən) seçilən 45 deputatdan ibarətdir.
Muxtar respublikanın Nazirlər Kabinetinin tərkibinə baş nazir, onun müavinləri, Naxçıvan Muxtar Respublikasının nazirləri və başqa mərkəzi icra hakimiyyəti orqanlarının rəhbərləri daxildir. Kabinetin tərkibini baş nazirin təklifi ilə Ali Məclis təsdiqləyir.
