Gəlir azalıb, ictimai iaşə və ödənişli xidmətlər geriləyib
2020-ci ilin aprel ayında Azərbaycan əhalisinin nominal gəlirləri ötən ilin eyni ayı ilə müqayisədə 14,4 faiz, bu ilin mart ayına nisbətən 24,6 faiz azalıb. Novator.az-ın məlumatına görə, Dövlət Statistika Komitəsi bildirir ki, yanvar-aprel ayları üzrə gəlirlər əvvəlki ilin eyni dövrünə nisbətən 1,3 faiz yüksəlib, 17 milyard 145,7 milyon manat və ya hər nəfərə orta hesabla 1722 manat təşkil edib.
Başqa bir hesabata əsasən, koronavirus infeksiyasını cilovlamaq üçün tətbiq olunan məhdudiyyətlər üzündən bu ilin aprel ayında ictimai iaşə dövriyyəsi əvvəlki ayla müqayisədə 2,3 dəfə, ötən ilin aprel ayı ilə müqayisədə 4 dəfə azalıb. Ötən ilin yanvar-aprel ayları ilə müqayisədə 27,6 faiz azalma qeydə alındığı vurğulanır.
Ödənişli xidmətlərdə eyni dövr üzrə 25,8 faiz azalma olduğu qeyd edilir. Hesabata görə, yanvar-aprel aylarında hər bir ölkə sakini orta hesabla 243,9 manatlıq və ya ötən ilin müvafiq dövrü ilə müqayisədə nominal ifadədə 25,5 manat az müxtəlif ödənişli xidmətlərdən yararlanıb.
