Əli Kərimlinin təzə telefonu da bağlanıb
Bakının Süleyman Rəhimov küçəsində yaşayan AXCP sədri, Demokratik Qüvvələrin Milli Şurasının Koordinasiya Mərkəzinin üzvü Əli Kərimlinin evində aprelin 14-dən bəri internet və telefon rabitəsi yoxdur.
Mayın 19-da Əli Kərimli özünün “Facebook” səhifəsində məlumat yayaraq dostlarının ona yeni mobil telefon göndərdiyini, bunun sayəsində internetə çıxış imkanının yarandığını bildirmişdi.
Novator.az-ın məlumatına görə, AXCP Ali Məclisi Rəyasət Heyətinin üzvü Fuad Qəhrəmanlı mayın 20-si axşam saatlarında Əli Kərimlinin mobil telefonunun, internetə çıxışının yenə qapadıldığını yazıb: “Əli Kərimlinin yalnız məhdud sayda adamın bildiyi nömrəsi müəyyənləşdirilərək bağlanıb və interneti də kəsilib”.
Mayın 20-də “Azadlıq” radiosuna müsahibə verən Avropa Şurası Parlament Assambleyasının Azərbaycanda siyasi məhbuslar üzrə məruzəçisi Torhildur Sunna Evarsdottir AXCP sədri Əli Kərimlinin telefonun kəsilməsi ilə bağlı xəbərlərdən narahat olduğunu vurğulayıb: “Narahatam ki, Əli Kərimli de-fakto ev həbsindədir. Biz həmçinin narahatıq ki, onun telefonları və interneti blok olunub. Bu durumu yaxından izləyirik”.
1965-ci il təvəllüdlü Əli Kərimli milli azadlıq hərəkatının öncül şəxslərindəndir. Əbülfəz Elçibəyin prezidentliyi zamanı (1992-1993) əvvəl Prezident Aparatının şöbə müdiri, sonra dövlət katibi vəzifəsində çalışıb.
1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2000-ci ildən AXCP-yə rəhbərlik edir.
AXCP sədri təcridetmə əməliyyatından yazıb
Əli Kərimli yenə internetsiz qalıb
