Naxçıvanda orta maaş nə qədər artıb?
Naxçıvan Muxtar Respublikasının sosial-iqtisadi göstəriciləri açıqlanıb. Novator.az bildirir ki, yerli Dövlət Statistika Komitəsinin hesabatına görə, 2020-ci ilin yanvar-aprel aylarında muxtar respublikada 743 milyon 26,8 min manatlıq ümumi daxili məhsul istehsal olunub, bu da 2019-cu ilin müvafiq dövrü ilə müqayisədə 0,7 faiz çoxdur.
Hər bir nəfərə düşən ümumi daxili məhsulun həcmi 1615,3 manat göstərilir.
2019-cu ilin ilk dörd ayına nəzərən sənayedə 0,9 faiz, sərmayə qoyuluşunda 0,8 faiz, kənd təsərrüfatında 3,2 faiz, informasiya və rabitə xidmətlərində 2,2 faiz, kreditlərdə 2,2 dəfə yüksəlişin qeydə alındığı vurğulanır.
Hesabata əsasən, muxtar respublikada 383 növdə məhsul istehsal olunur, 108-i ərzaq olmaqla 350 növdə məhsula tələbat tamamilə yerli imkanlar hesabına ödənir.
Qeyd olunur ki, yanvar-mart aylarında muxtar respublika iqtisadiyyatında bir işçiyə hesablanmış orta aylıq əməkhaqqı 519,3 manat təşkil edib, bu da 2019-cu ilin müvafiq dövrü ilə müqayisədə 19,8 faiz çoxdur.
