Hakimlərə cəza hesabatı
Məhkəmə müşavirəsindən rəsmi məlumat yayılıb. Müşavirə mayın 19-da Məhkəmə-Hüquq Şurasının sədri, ədliyyə naziri Fikrət Məmmədov və Ali Məhkəmənin sədri Ramiz Rzayevin iştirakı ilə videokonfrans formatında keçirilib. Tədbirə Ali Məhkəmənin sədr müavini, Ali Məhkəmə və apellyasiya məhkəmələrinin kollegiya sədrləri, apellyasiya, regional və digər birinci instansiya məhkəmələrinin sədrləri qatılıblar.
Qeyd edilib ki, son bir ildə 50-dən çox məhkəmədə monitorinqlər aparılıb, aşkar edilən pozuntular 150-dən artıq hakim və məhkəmə sədrinin diqqətinə çatdırılıb.
Yol verilmiş pozuntulara, o cümlədən korrupsiya əməllərinə şərait yaradan hallara görə ötən il 48 hakimin intizam məsuliyyətinə cəlb edildiyi, 2 nəfərin səlahiyyətlərinə xitam verildiyi, 7 nəfərin tutduğu vəzifədən azad olunduğu, son aylarda Ali Məhkəmənin 5 hakiminin aşağı işə keçirildiyi, 7-nin səlahiyyətlərinə xitam edildiyi vurğulanıb.
2005-ci ildən fəaliyyətə başlayan Məhkəmə-Hüquq Şurası vakant hakim vəzifələrinə hakim olmayan namizədlərin seçilməsinin təşkili, hakimlərin fəaliyyətinin qiymətləndirilməsi, onların iş yerinin dəyişdirilməsi, vəzifədə irəli çəkilməsi, intizam məsuliyyətinə cəlb edilməsi funksiyalarını həyata keçirən orqandır.
