Qərarların icrası: 1,7 milyard manatdan çox vəsait ödətdirilib
Ədliyyə Nazirliyi 18 may müşavirəsindən rəsmi məlumat yayıb. Müşavirə nazir müavinləri Eldar Nuriyev və Toğrul Musayevin, nazirliyin İcra və Probasiya xidmətləri və yerli qurumlarının, regional ədliyyə idarələri rəhbərlərinin iştirakı ilə videokonfrans formatında keçirilib.
Müşavirədə qeyd olunub ki, 2019-cu ildə icraatda olmuş 861 mindən çox icra sənədinin 65 faizinin icrası təmin edilib, hüquqi və fiziki şəxslərə 1,7 milyard manatdan çox vəsait ödətdirilib.
Aliment tələbinə dair icra işləri üzrə tələbkar şəxslərə 143,5 milyon manat vəsait ödəndiyi, azadlığın məhdudlaşdırılması və digər cəzalara məhkum olunmuş 3200-dən çox şəxsə elektron qolbaq tətbiq edildiyi bildirilib.
Hesabata görə, ötən bir ildə 22 nəfər intizam məsuliyyətinə alınıb, o cümlədən 8 nəfər ədliyyə orqanlarından xaric olunub və ya vəzifəsindən azad edilib, 3 nəfər barəsində toplanmış materiallar prokurorluğa göndərilib.
