Ticarət hesabatları
2020-ci ilin yanvar-aprel aylarında pərakəndə ticarət şəbəkəsində əhaliyə 11 milyard 516,1 milyon manatlıq, o cümlədən 6 milyard 169,7 milyon manatlıq ərzaq məhsulları, içkilər və tütün məmulatları, 5 milyard 346,4 milyon manatlıq qeyri-ərzaq malları satılıb. Novator.az-ın məlumatına görə, Dövlət Statistika Komitəsi bildirir ki, koronavirus məhdudiyyətləri işgüzar fəallığı zəiflətdiyi üçün aprel ayında pərakəndə ticarət dövriyyəsi mart ayı ilə müqayisədə 33,1 faiz, o cümlədən qeyri-ərzaq malları üzrə 38,6 faiz azalıb.
Yanvar-aprel aylarında ticarət dövriyyəsinin 2019-cu ilin müvafiq dövrü ilə müqayisədə 1,9 faiz, o cümlədən qeyri-ərzaq malları üzrə 6,5 faiz azaldığı, ərzaq məhsulları, içkilər və tütün məmulatları üzrə 2,6 faiz artdığı vurğulanır.
Başqa bir hesabata əsasən, yanvar-mart aylarında Azərbaycanın hüquqi və fiziki şəxsləri 153 ölkədəki tərəfdaşları ilə ticarət əməliyyatları həyata keçirib, 91 ölkəyə məhsul ixrac olunub, 142 ölkədən məhsul alınıb.
Üç ayda xarici ticarət dövriyyəsinin faktiki qiymətlərlə 16 faiz, real ifadədə 15,8 faiz, o cümlədən idxalın 32,9 faiz, ixracın 4,8 faiz azaldığı bildirilir: “Qeyri neft-qaz məhsullarının ixracı 2019-cu ilin yanvar-mart aylarına nisbətən faktiki qiymətlərlə 3,4 faiz artıb, real ifadədə isə 5,2 faiz azalaraq 429 milyon dollar təşkil edib”.
