Neftin qiymətində müsbət tərpəniş var
AZƏRTAC-ın 18 may məlumatına görə, brent markalı xam neftin qiymətində artım müşahidə olunur. Bu, neft hasilatçılarının istehsala məhdudiyyətlər tətbiq etməsi, həmçinin müxtəlif ölkələrdə koronavirusla bağlı karantin rejiminin yumşaldılmasının tələbatı artırması ilə əsaslandırılır. Brent neftinin barrelinin London birjasında 34,23 dollara, layt markalı neftin barrelinin Nyu-York birjasında 31,51 dollara satıldığı bildirilir.
Energetika Nazirliyi “AzəriLayt” markalı Azərbaycan neftinin barrelinə 32,77 dollar qiymət qoyulduğunu bəyan edib.
Azərbaycanın 2020-ci il büdcəsində bir barrel neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43, maya 22,92 dollarla başlayıb.
Neft mart ayından başlayaraq dünyanı bürüyən koronavirus xəstəliyi fonunda tələbatın azalması üzündən kəskin ucuzlaşıb. Aprelin 12-də iri neft ixracatçıları – OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsi (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) gündəlik hasilatı mərhələlərlə azaltmaq razılığı əldə ediblər. Həmin razılaşmaya əsasən, mayın 1-dən Azərbaycanın gündəlik neft hasilatı 554 min barrel, iyulun 1-dən 587 min barrel, 2021-ci il yanvarın 1-dən 620 min barrel olmalıdır.
