İkibaşlı hökumət
İsraildə bir ildən artıq davam edən müvəqqəti hökumət dövrü başa çatıb.
Novator.az bildirir ki, İsrail hökumətini qurmaq üçün 120 nəfərlik parlamentdə 61 mandat lazımdır. 2019-cu il aprelin 9-da və sentyabrın 17-də keçirilmiş seçkilərdən sonra hökumət qurmaq mümkün olmayıb. Bu il martın 2-də keçirilmiş parlament seçkisində baş nazir Benyamin Netanyahunun Likud Partiyası 36 mandat, Beni Qantsın liderlik etdiyi müxalif blok 33 mandat götürüb, 6-15 arası mandat əldə edən daha 6 siyasi qüvvə qanunverici orqanda təmsil olunmaq hüququ qazanıb.
Uzun danışıqlardan sonra Benyamin Netanyahu ilə Beni Qants hökumət formalaşdırmaq razılığına gəliblər. Mayın 17-də parlament yeni hökumətin tərkibini təsdiqləyib. Razılaşmaya əsasən, baş nazir kürsüsünü Benyamin Netanyahu tutub. 2021-ci il noyabrın 17-də isə baş nazir kürsüsü Beni Qantsa keçəcək. Hazırda Beni Qants müdafiə naziridir.
1949-cu il təvəllüdlü Benyamin Netanyahu 2009-cu ildən baş nazirdir. O, 1996-1999-cu illərdə də hökumətə rəhbərlik edib.
1947-ci ildə BMT Fələstin torpaqlarının bölünməsinə qərar verib. Həmin qərar ərazidə İsrail və Fələstin dövlətlərinin qurulmasını nəzərdə tutub. 1948-ci il may ayının 14-də İsrail müstəqil dövlət elan olunub.
