Cəbhəçiyə cinayət işi qaldırılıb
AXCP fəalı, partiya sədri Əli Kərimlinin mühafizəçisi Niyaməddin Əhmədovdan yeni xəbər var.
Niyaməddin Əhmədov aprelin 16-sı Bakıda tutularaq polis işçisinin qanuni tələbinə qəsdən tabe olmamaq və karantin rejiminin tələbini pozmaq ittihamı ilə 30 sutka inzibati həbsə məhkum edilmişdi. AXCP-nin bəyan etdiyinə görə, Niyaməddin Əhmədov hərəkət icazəsi olduğu halda, Süleyman Rəhimov küçəsində, Əli Kərimlinin yaşadığı binadan çıxarkən tutulmuşdu.
Daxili İşlər Nazirliyinin Binəqədi rayonundakı inzibati həbs məntəqəsində saxlanan fəalın cəza müddəti mayın 15-i axşam başa çatıb. Ancaq Niyaməddin Əhmədov azadlığa çıxmayıb və ondan heç bir soraq olmadığı barədə məlumat yayılıb.
“Turan”ın 18 may məlumatına görə, Niyaməddin Əhmədova Cinayət Məcəlləsinin 214-1-ci maddəsi ilə terrorçuluğu maliyyələşdirmə ittihamı irəli sürülüb və Nəsimi Rayon Məhkəməsi onun barəsində 4 ay müddətinə həbs qətimkan tədbiri seçib.
Terrorçuluğu maliyyələşdirmə ittihamı 10 ildən 14 ilədək müddətə azadlıqdan məhrumetmə cəzası nəzərdə tutur.
Mayın 18-də AXCP məsələ ilə bağlı bəyanat yayıb. Bəyanatda Niyaməddin Əhmədova irəli sürülən ittiham rədd edilir, onun əslində partiya sədri Əli Kərimlini müdafiə etdiyi üçün cəzalandırıldığı bildirilir.
AXCP bəyan edir ki, 30 illik siyasi tarixində bir dəfə də olsun zorakı metodlardan istifadə etməmiş təşkilatın üzvünə terrorçuluğu maliyyələşdirmə ittihamı vermək absurddur, hüququn ayaq altına atılması və siyasi qisasçılıqdır. Partiya dövlət səviyyəsində hüquqsuzluğa və zorakılığa son qoyulmasını tələb edir.
