İstehsal və inflyasiya statistikası
Dövlət Statistika Komitəsi yeni rəsmi göstəricilər açıqlayıb. Novator.az bildirir ki, hesabata görə, 2020-ci ilin yanvar-aprel aylarında ölkədə ümumi daxili məhsulun (ÜDM) həcmi əvvəlki ilin eyni dövrü ilə müqayisədə 0,2 faiz artaraq 22 milyard 400,5 milyon manat təşkil edib: “İqtisadiyyatın neft-qaz sektorunda əlavə dəyər 1,5 faiz yüksəlib, qeyri neft-qaz sektorunda 0,8 faiz düşüb. ÜDM istehsalının 39,3 faizi sənayenin, 10,7 faizi ticarətin və nəqliyyat vasitələri təmirinin, 7,4 faizi nəqliyyat və anbar təsərrüfatının, 5,6 faizi tikintinin, 3,9 faizi kənd təsərrüfatı, meşə təsərrüfatı və balıqçılığın, 2 faizi informasiya və rabitənin, 1,9 faizi turistlərin yerləşdirilməsi və ictimai iaşənin, 18,9 faizi digər sahələrin payına düşüb, məhsula və idxala xalis vergilər ÜDM-in 10,3 faizinə bərabər olub”.
Əhalinin hər nəfərinə düşən ÜDM 2249,7 manat göstərilir.
İstehlak bazarında qiymətlərin dəyişməsi haqqında hesabata əsasən, yanvar-aprel aylarında istehlak 2019-cu ilin ilk dörd ayına nisbətən 3 faiz, o cümlədən ərzaq məhsulları, içkilər və tütün məmulatları 5,4 faiz, qeyri-ərzaq məhsulları 1,2 faiz, əhaliyə göstərilmiş ödənişli xidmətlər 1,1 faiz bahalaşıb.
