İşsiz şəxslərin özünüməşğulluğunun təşkili qaydası
Nazirlər Kabineti “İşsiz şəxslərin özünüməşğulluğunun təşkili qaydası”nı təsdiqləyib. Novator.az bildirir ki, qaydaya görə, özünüməşğulluğun təşkili zamanı ünvanlı dövlət sosial yardımı alan şəxslərə, əlilliyi olan şəxslərə, bir ildən artıq işsiz kimi qeydiyyatda olanlara, pensiya yaşına iki ildən az qalmış şəxslərə, cəzaçəkmə yerlərindən azad edilmiş işsiz şəxslərə üstünlük verilir.
İşsizlikdən sığorta ödənişi alan işsiz şəxslər özünüməşğulluğa cəlb olunmurlar.
Mülkiyyətində kənd təsərrüfatına yararlı torpaq payı olub digər məşğulluğu olmayan işaxtaran şəxslər 1 il müddətində özünüməşğulluğa cəlb olunmuş işsiz şəxslərin ümumi sayının 50 faizindən çox olmamaq şərti ilə özünüməşğulluğa cəlb edilirlər.
Özünüməşğulluğun təşkili bu mərhələlərdə həyata keçirilir:
özünüməşğulluğun təşkili ilə bağlı məsləhətlərin və məlumatların verilməsi;
əmək bazarının təhlili əsasında iqtisadiyyatın sahələri üzrə özünüməşğulluq istiqamətinin seçilməsinə və təşkilinə köməklik göstərilməsi;
özünüməşğulluğun təşkili üçün biznes-planın hazırlanmasına köməklik göstərilməsi;
seçilmiş özünüməşğulluq istiqamətinin təşkili üçün işsiz şəxslərə natura şəklində material, avadanlıq və digər əmlakın 2 il müddətinə müqavilə əsasında verilməsi;
özünüməşğulluğa cəlb olunmuş şəxsin fəaliyyətinin 2 il müddətində dövri monitorinqi.
Özünüməşğulluğun təşkilini Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyi nazirliyin Mərkəzləşdirilmiş Elektron İnformasiya Sisteminin “Məşğulluq” altsistemində işsiz (işaxtaran) kimi qeydə alınmış şəxsin müraciəti əsasında həyata keçirir. Agentlik əmək bazarının təhlili əsasında hər il üçün özünüməşğulluğa cəlb ediləcək şəxslərin sayını və özünüməşğulluq istiqamətlərini müəyyən edir, bu barədə məlumatları nazirliyin rəsmi internet saytında yerləşdirir və onların mütəmadi yenilənməsini təmin edir.
