İqtisadi itki: rəqəmlər nə deyir?
Dövlət Statistika Komitəsinin rəsmi hesabatına görə, 2020-ci ilin yanvar-aprel aylarında ümumi daxili məhsul (ÜDM) ötən ilin eyni dövrü ilə müqayisədə 0,2% artaraq 22 milyard 400,5 milyon manat dəyərində olub.
Novator.az bildirir ki, iqtisadçı Azər Mehtiyev bununla bağlı şərhində koronavirus pandemiyasına görə tətbiq olunmuş karantin dövründə iqtisadi fəallığın necə düşməsinə diqqət çəkir: “Aprel ayı ərzində ümumi daxili məhsul mart ayındakı istehsaldan 1 milyard 663,7 milyon manat, yaxud 29% az olub. Mart ayında fevralla müqayisədə 333,1 milyon manat və ya 5,5% azalma qeydə alınmışdı. Dövlət Statistika Komitəsi detalları açıqlamadığı üçün azalmanın hansı sahələrdə nə qədər olduğu hələlik görünmür. Amma ilkin məlumatlar əsasında hesablamaq olar ki, aprel ayı ərzində qeyri-neft sektorunda martla müqayisədə 1 milyard 119,5 milyon manat, yaxud 27,7% az ÜDM yaradılıb.
Ötən ay iqtisadiyyat naziri Mikayıl Cabbarov Azərbaycan iqtisadiyyatının koronavirus pandemiyası üzündən gündə təqribən 120-150 milyon manat itirdiyini bəyan etmişdi. Bu halda gözlənən itki ən azı 3,6 milyard manat olmalı idi. Amma Dövlət Statistika Komitəsinin açıqladığı məlumata əsasən, hətta mart ayında olan itkiləri də nəzərə alsaq, aprel ayında ümumi itki təqribən 2 milyard manat olub, bu da gündəlik itkinin təqribən 67 milyon manata yaxın olduğunu söyləməyə əsas verir. 2020-ci il üzrə proqnozlaşdırılan ÜDM-ə əsasən aprel ayına gözlənən artımı nəzərə alsaq, gündəlik itkinin təqribən 70-75 milyon manat ola biləcəyi görünür. Bu məbləğ müstəqil ekspertlərin hesablamaları ilə üst-üstə düşür”.
