Milli futbol çempionatı: bərpa anonsu gəldi
Azərbaycanın milli futbol çempionatının bərpası barədə ilkin razılıq əldə olunub. Qol.az xəbər verir ki, məsələ Klublar Komitəsinin 14 may iclasında müzakirəyə çıxarılıb. AFFA və Professional Futbol Liqası rəsmilərinin də qatıldığı iclasda yekun qərarın yaxın günlərdə elan ediləcəyi bildirilib.
2019-2020 mövsümü koronavirus pandemiyasına görə mart ayının ortalarında dayandırılıb.
Novator.az bildirir ki, yüksək liqada oynanmamış 8 tur qalır. 20 turdan sonra “Qarabağ” komandası 45 xalla liderlik edir. “Neftçi” 37 xalla ikinci, “Keşlə” 30 xalla üçüncü pillədədir.
“Sumqayıt”la “Zirə”nin 23, “Sabah”ın 21, “Səbail”in 20, “Qəbələ”nin 19 xalı var.
İlk çempionatın keçirildiyi 1992-ci ildən bəri 8 dəfə “Neftçi”, 7 dəfə “Qarabağ”, 3 dəfə “Kəpəz”, 2 dəfə “Şəmkir”, 2 dəfə “Bakı”, 2 dəfə “İnter”, 1 dəfə “Turan”, 1 dəfə “Xəzər Lənkəran” çempion olub.
