Həbsin rəsmi səbəbi açıqlandı
Baş Prokurorluq Korrupsiyaya Qarşı Mübarizə Baş İdarəsinin mayın 13-də tutduğu jurnalist Əfqan Sadıqovun işi üzrə məlumat yayıb. Qeyd olunur ki, Azel.tv portalının baş redaktoru Əfqan Sadıqov barədə Korrupsiyaya Qarşı Mübarizə Baş İdarəsinə verilən məlumat əsasında istintaq-əməliyyat tədbirləri həyata keçirilib: “Əfqan Sadıqovun Xeberfakt.az portalının baş redaktoru Sakit Muradovla qabaqcadan əlbir olaraq barələrində rüsvayedici məlumatları kütləvi informasiya vasitələrində yayacaqları hədəsi ilə mayın 9-da Sumqayıt Şəhər İcra Hakimiyyətinin vəzifəli şəxslərindən 15 min manat məbləğində pul vəsaitini tələb etdikləri bilinib. Korrupsiyaya Qarşı Mübarizə Baş İdarəsinin əməkdaşlarının məhkəmə qərarı əsasında həyata keçirdiyi əməliyyat-axtarış tədbirləri nəticəsində 13 may 2020-ci ildə vəzifəli şəxslərdən tələb etdikləri pulun 10 min manatını paytaxtın Xətai rayonu ərazisində alarkən hər iki şəxs cinayət başında yaxalanıb.
Əfqan Sadıqov ifadə verməkdən imtina etsə də, Sakit Muradov törətdikləri əməli tam etiraf edib.
Faktla bağlı Cinayət Məcəlləsinin 182.2.1 və 182.2.4-cü (qabaqcadan əlbir olan bir qrup şəxs halında xeyli miqdarda əmlakı hədə-qorxu ilə tələb etmə) maddələri ilə cinayət işi başlanıb.
Əfqan Sadıqovun barəsində məhkəmənin qərarı ilə həbs, Sakit Muradovun barəsində isə polisin nəzarəti altına vermə qətimkan tədbiri seçilib”.
