Yeni müəssisələr açılıb
Prezident İlham Əliyev mayın 12-si Sumqayıtda “Gilan Tekstil Park”ın tibbi maska fabrikinin və tikiş fabrikinin nəzdində fəaliyyət göstərən qoruyucu kombinezonların istehsalı müəssisəsinin açılışında iştirak edib.
AZƏRTAC xəbər verir ki, tibbi maska fabrikində istehsal olunan maskalar üçqatdır və orta qatı xüsusi süzgəc funksiyasını yerinə yetirən toxunmamış parçadan ibarətdir: “Bu maskalar müxtəlif kateqoriyalı virus və infeksiyalara qarşı davamlıdır. İlk mərhələdə fabrikdə gün ərzində 140 min ədəd maska istehsalı nəzərdə tutulur. Mayın sonunadək burada əlavə avadanlıq quraşdırılacaq, bu isə istehsal gücünü artırmağa imkan verəcək.
“Gilan Tekstil Park”da birdəfəlik istifadə üçün qoruyucu kombinezonların da istehsalına başlanıb. Məhsullar polietilen qoruyucu membranla örtülüb, yüksək sıxlıqlı polipropilendən olan toxunmamış parçadan tikilir. Bu parça möhkəmliyi, sukeçirməzliyi, kimyəvi maddələrə davamlılığı, yüngüllüyü ilə fərqlənir.
Qoruyucu kombinezonlar istifadəçiləri virus, infeksiya, zərərli kimyəvi maddələrdən və ya həssaslıq yarada bilən məhsul və proseslərdən qoruyur. Burada gün ərzində 6 min ədəd qoruyucu kombinezonun istehsalı nəzərdə tutulur”.
