Paşinyanın Qarabağ səfərləri
Ermənistanın baş naziri Nikol Paşinyan mayın 9-da həyat yoldaşı Anna Akopyanla birgə Azərbaycanın işğaldakı torpaqlarına gələrək Şuşanın ələ keçirilməsinin 28-ci ili mərasimlərinə qatıldı və bəzi hərbi hissələrə baş çəkdi.
Əsası 18-ci əsrdə qoyulan Şuşa 1750-ci ildən Qarabağ xanlığının paytaxtı, 1822-ci ildən Qarabağ əyalətinin (daha sonra Şuşa qəzasının) baş şəhəri, 1923-cü ildən isə Azərbaycanın Dağlıq Qarabağ vilayətində rayon mərkəzi olub.
1988-ci ildə ermənilər Dağlıq Qarabağın Ermənistana verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb, bölgə hissə-hissə ermənilərin əlinə keçib.
1992-ci il mayın 8-nə keçən gecə Dağlıq Qarabağda azərbaycanlıların əsas dayaq nöqtəsi olan Şuşaya hücum edən erməni birləşmələri mayın 9-da şəhəri ələ keçirib. Bununla da Dağlıq Qarabağın işğalı başa çatıb.
1993-cü ildən bəri ermənilər Dağlıq Qarabağ ətrafındakı Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonlarını da işğal altında saxlayır.
1975-ci il təvəllüdlü Nikol Paşinyan 2018-ci il mayın 8-dən Ermənistanın baş naziridir. Həyat yoldaşı Anna Akopyan “Aykakan jamanak” qəzetinin baş redaktorudur. Onların oğlu Aşot Paşinyan 2018-ci ilin iyul ayından Dağlıq Qarabağda hərbi xidmət keçir.
Novator.az Ermənistan hökumətinin rəsmi saytına (Gov.am) istinadla bildirir ki, 9 may 2020-ci il səfəri baş nazir postuna oturandan bəri Nikol Paşinyanın Azərbaycan torpaqlarına rəsmən bəyan edilən 8-ci səfəri olub.
Nikol Paşinyan Dağlıq Qarabağa ilk dəfə 2018-ci il mayın 9-da gəlib.
2018-ci ildə daha iki səfər qeydə alınıb: iyunun 16-da və sentyabrın 18-də.
2019-cu ildə Nikol Paşinyan martın 11-12-də, mayın 9-da və avqustun 5-7-də Dağlıq Qarabağda olub.
2020-ci ilin ilk səfəri yanvarın 28-nə təsadüf edib.
