Operativ qərargahın 12 may məlumatı
Nazirlər Kabineti yanında operativ qərargahın mayın 12-də yaydığı məlumata görə, ölkədə daha 104 nəfər koronavirus infeksiyasına yoluxub, 55 nəfər müalicə olunaraq xəstəxanadan buraxılıb, 1943-cü il təvəllüdlü bir xəstə vəfat edib.
Rəsmi hesabata görə, ümumən ölkədə 2693 nəfərin koronavirusa yoluxması bilinib, onların 1735-i müalicə olunaraq sağalıb, 33-ü vəfat edib, 925-i xüsusi rejimli xəstəxanalardadır.
2019-cu ilin dekabrında Çində üzə çıxan koronavirus xəstəliyi 212 ölkə və əraziyə yayılıb, 289 mindən çox adam ölüb.
Azərbaycanda infeksiyanı cilovlamaq məqsədilə sərhədlər qapadılıb, təhsil ocaqları, mədəniyyət və idman obyektləri bağlanıb, ictimai iaşəyə, ticarətə, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyətlər tətbiq olunub, toy və şənlik məclisləri, dəfn çıxılmaqla yas mərasimlərinin keçirilməsi yasaqlanıb.
