Avropa Məhkəməsindən yeni qərarlar gəlir
Avropa İnsan Hüquqları Məhkəməsi mayın 14-də Azərbaycandan göndərilmiş üç şikayət üzrə qərarlarını elan edəcək. Novator.az-ın məlumatına görə, hüquqşünas Xalid Ağalıyev yazır ki, şikayətlərin birini jurnalist Sevinc Vaqifqızı göndərib. Baş Prokurorluğun Ağır Cinayətlərə Dair İşlər üzrə İstintaq İdarəsində aparılan bir cinayət işinə şahid kimi cəlb olunan Sevinc Vaqifqızı bir neçə il ölkədən çıxış yasağı ilə üzləşib. Jurnalist qadağanın götürülməsi üçün məhkəmələrə üz tutsa da, məqsədinə nail ola bilməyib, Avropa Məhkəməsinə şikayət edib. O, Avropa İnsan Hüquqları Konvensiyası ilə verilmiş hərəkət azadlığı, şəxsi həyata hörmət, ifadə azadlığı hüquqlarına müdaxilə olunduğunu bildirib.
2019-cu ilin mayında Sevinc Vaqifqızının ölkədən çıxışına yasaq götürülüb.
Avropa Məhkəməsinin elan edəcəyi digər qərar Georgi Nikolayevin iddiası ilə bağlıdır. Ərizəçi hərəkət azadlığı hüququnun pozuntusundan şikayətçi olub.
Üçüncü qərar Xeyrulla Ağayevin ərizəsini əhatə edir. Xeyrulla Ağayev təxminən 10 il əvvəl küçə yürüşündə tutulub, icazəsiz yürüşə qatılmaq və polisin qanuni tələbinə tabe olmamaq ittihamı ilə 7 sutka inzibati həbs cəzası alıb. Ərizəçi ədalətli məhkəmə araşdırması hüququnun pozulduğunu iddia edib.
