Dünya Səhiyyə Təşkilatına alternativ yaranır?
ABŞ Dünya Səhiyyə Təşkilatına (DST) alternativ qurum yarada bilər. Novator.az-ın məlumatına görə, dövlət katibi Mayk Pompeo mayın 6-da belə açıqlama verib. O qeyd edib ki, Vaşinqton DST-nin koronavirus pandemiyası ilə bacarmadığı qənaətindədir.
2019-cu ilin dekabrında Çində üzə çıxan, DST-nin bu ilin mart ayında qlobal pandemiya elan etdiyi koronavirus xəstəliyi 212 ölkə və əraziyə yayılıb, 265 mindən çox adam ölüb.
Mayk Pompeo ABŞ hakimiyyətinin DST-nin işindən narazı olduğunu vurğulayıb: “Prezident Donald Tramp qarşımızda məqsəd qoyub, DST-nin yenidən uğursuzluq yaşamasına imkan vermək olmaz. Əgər DST öz öhdəliklərini yerinə yetirə bilməyəcəksə, bu quruma yüz milyonlarla dolların ödənməsinə imkan verə bilmərik”.
Dövlət katibinin sözlərinə görə, səhiyyə sahəsində dünya lideri olmaq ABŞ üçün çətin deyil: “Vaşinqton tibb sahəsində beynəlxalq kampaniyaları necə aparmağı bilir və insanların sağlamlığı naminə öz agentliyini yaratmağa hazırdır”.
Koronavirus ABŞ-da 74 min 800-dən çox adamın ölümünə səbəb olub. ABŞ bu virusun Çində süni yolla yaradıldığını iddia edir, DST-ni isə vaxtında həyəcan təbili çalmamaqda günahlandıraraq onun maliyyəsini kəsib.
1948-ci ildə yaradılmış DST-nin mərkəzi qərargahı İsveçrənin Cenevrə şəhərində yerləşir. BTM-nin qurumu olan, 190-dan çox ölkəni birləşdirən təşkilata efiopiyalı Tedros Adhanom Qebreyesus baş direktorluq edir.
Səidə Hüseynova
