Parlamentdə yeni sözçü
Milli Məclisə yeni mətbuat katibi təyin olunub: Akif Təvəkküloğlunu (Nəsirov) Ceyhun Əli əvəzləyib.
Novator.az-ın məlumatına görə, Ceyhun Əli 1984-cü ildə Salyan şəhərində doğulub. Bakıda böyüyüb, İncəsənət Gimnaziyasını, Bakı Slavyan Universitetinin filologiya fakültəsini bitirib.
Son təyinata qədər İctimai Televiziyanın aparıcısı olub.
Fevralın 9-da keçirilmiş parlament seçkisində Milli Məclis yenilənib. Martın 10-da Sahibə Qafarova parlament sədri, Əli Hüseynli parlament sədrinin birinci müavini, Adil Əliyev və Fəzail İbrahimli sədr müavini seçiliblər.
9 fevral seçkisi 125 dairədə keçirilib. 4 dairə üzrə səsvermənin nəticələri ləğv olunduğu üçün yeni parlament hələlik 121 nəfərdən ibarətdir.
Prezident İlham Əliyevin sədrlik etdiyi Yeni Azərbaycan Partiyası parlamentdə 70 deputatla təmsil olunur.
Vətəndaş Həmrəyliyi Partiyası 3 yer götürüb.
Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 mandatı var.
40 deputat partiyasızdır.
