Cəbhə bölgəsinə reyd
Prezidentin köməkçisi, Prezident Administrasiyasının hərbi məsələlər şöbəsinin müdiri general-polkovnik Məhərrəm Əliyev və müdafiə naziri general-polkovnik Zakir Həsənov cəbhə zonasında tikintisi yekunlaşmaqda olan hərbi hissəyə baş çəkiblər. Mod.gov.az-ın 6 may məlumatına görə, məruzə edilib ki, hərbi hissədə şəxsi heyətin yaşayışı və xidməti-döyüş tapşırıqlarının icrası üçün lazımi şərait yaradılır.
Tikintinin gedişatını yoxlayan müdafiə naziri inşaat işlərinin keyfiyyətli aparılması və vaxtında başa çatdırılması ilə əlaqədar tapşırıqlar verib.
Mayın 5-də yayılan rəsmi məlumatda isə bildirilir ki, Məhərrəm Əliyevlə Zakir Həsənov cəbhə bölgəsindəki hərbi hissələrin silah və hərbi texnikasının döyüş qabiliyyətini yoxlayıblar. Hərbi hissələrin birinin ərazisində inşa olunan trenajor binasına gələn general-polkovniklər ekipajların tank və piyada döyüş maşınlarının təlim-məşq qurğularında atış və sürücülük məşqlərini izləyiblər.
Müdafiə nazirinin əmri ilə döyüş texnikası təlim-həyəcan siqnalı ilə əraziyə çıxarılıb və tapşırıq uğurla icra olunub.
