Bakıda orta maaş
Azərbaycan paytaxtında muzdla işləyən şəxslərin orta aylıq nominal əməkhaqqı 2020-ci il martın 1-nə 958 manata çatıb. Novator.az-ın məlumatına görə, Bakı Şəhər Statistika İdarəsi belə hesabat yayıb.
Rəsmi açıqlamada qeyd olunur ki, yanvar-mart aylarında sənayedə istehsal və xidmətlərin həcmi əvvəlki ilin ilk rübü ilə müqayisədə 0,8 faiz artaraq 8,8 milyard manat səviyyəsində qərarlaşıb. Sənayedə qeyri-dövlət sektorunun payı 79,8 faiz göstərilir.
Hesabata əsasən, üç ayda tikinti müəssisələrinin yerinə yetirdiyi inşaat işlərinin 63,7 faizi tikinti, yenidənqurma və genişləndirmənin, 7,8 faizi əsaslı təmir, 5,9 faizi cari təmirin, 22,6 faizi sair tikinti işlərinin payına düşüb.
Statistika qurumu yanvar-mart aylarında ticarət dövriyyəsinin həcminin 2019-cu ilin eyni dövrünə nəzərən 0,7 faiz artdığını, ictimai iaşə dövriyyəsinin real ifadədə 14,2 faiz, əhaliyə göstərilən ödənişli xidmətlərin dəyərinin real ifadədə 6,3 faiz azaldığını bildirir.
2020-ci il martın 1-nə Azərbaycan iqtisadiyyatında muzdla çalışan işçilərin aylıq orta maaşı 712,3 manat olub. Eyni dövrə Naxçıvan Muxtar Respublikasında analoji göstərici 504,5 manat səviyyəsində rəsmiləşib.
