Pandemiyanın doğurduğu ideya: bir nəfərlik restoran
Koronavirus pandemiyası, bu pandemiyaya görə dünyanın müxtəlif yerlərində təbliğ və tətbiq edilən özünütəcrid siyasəti İsveçdə qəribə bir ideyanın ortaya çıxmasına səbəb olub.
Novator.az xəbər verir ki, İsveçdə təkadamlıq restoran yaradılıb. “Bir nəfərlik masa” (“Bord For En”) adlanan restoranın sahibi Rasmus Persson və Linda Karlsson cütlüyüdür.
Paytaxt Stokholmdan 350 kilometr aralıda yerləşən bu restoranın yeganə stolu və stulu çəmənlikdə qoyulub. Məkanda restoran işçiləri və əlavə qonaq olmayacaq. Yeməklər və içkilər qonağa ipdən asılmış səbətdə çatdırılacaq. Həmin ipin bir ucu restoran mətbəxinin pəncərəsinə, bir ucu isə qonaq oturan stolun yanındakı dirəyə bağlanıb.
Restoran mayın 10-da açılacaq. Avqustun 1-dək Rasmus Persson və Linda Karlsson cütlüyü gündə yalnız bir adama xidmət göstərmək niyyətindədir. Gün ərzində neçə dəfə yemək qonağın istəyinə bağlıdır.
“Niyə bir nəfərdən artıq qonaq qəbul etmək istəmirsiniz” sualına Karlsson belə cavab verib: “Biz istəyirik ki, insanlar bu vəziyyətdən istifadə edib özləri ilə vaxt keçirsinlər və özlərini daha yaxşı tanısınlar”.
İlkin Nizami
