Köçəryana əməliyyat anonsu
Ermənistanın sabiq prezidenti Robert Köçəryan yenidən əməliyyat oluna bilər. Novator.az-ın məlumatına görə, Yerevandakı “İzmirlyan” Tibb Mərkəzinin direktoru Armen Çarçyan mayın 1-də Armeniasputnik.am-ə belə açıqlama verib. O deyib ki, sabiq prezidentin səhhətində ciddi problemlər var: “Biz dava-dərman hesabına Robert Köçəryanın vəziyyətini sabitləşdirməyə çalışırıq, ancaq onun əlavə əməliyyata ehtiyacı var”.
Armen Çarçyan konkret hansı cərrahi əməliyyata ehtiyac duyulduğunu açıqlamayıb.
Robert Köçəryan “İzmirlyan” Tibb Mərkəzinə aprelin 28-də yerləşdirilib. O, ötən ilin oktyabr ayında “İzmirlyan”da xoşxassəli şişdən əməliyyat olunub, dekabrda orada reabilitasiya mərhələsindən keçib.
1954-cü il təvəllüdlü Robert Köçəryan Azərbaycana qarşı işğalçı müharibənin rəhbərlərindən biridir. 1992-ci ildən Dağlıq Qarabağdakı separatçı rejimə başçılıq edib, 1997-ci ildən Ermənistanda baş nazir, 1998-ci ildən prezident postlarını tutub.
2008-ci il fevralın 19-da keçirilmiş prezident seçkisində hakimiyyət işğalçı müharibənin qaniçən liderlərindən olan Serj Sərkisyana ötürülüb. Müxaliflər paytaxt Yerevanda seçkinin rəsmi nəticələrinə davamlı etiraz aksiyaları keçiriblər. Martın 1-də aksiyalar hərbi güclə dağıdılıb, 8 mülki şəxs, 2 polis əməkdaşı həlak olub.
2018-ci ildə Serj Sərkisyan hakimiyyəti çökəndən sonra bu iş üzrə istintaq yenilənib. Xüsusi İstintaq Xidməti Robert Köçəryanı 1 mart 2008-ci il qırğınının istintaqına cəlb edib, 2018-ci il iyulun 26-da ona cinayət işi qaldırıb. Sabiq prezident dövlətin konstitusiya quruluşunu zorla dəyişdirmədə ittiham edilir. O, xüsusilə külli miqdarda rüşvət almaqda da günahlandırılır.
2018-ci il iyulun 27-də Robert Köçəryan 2 ay müddətinə həbs edilib, avqustun 13-də azadlığa buraxılıb. Həmin il dekabrın 7-də Robert Köçəryan yenə tutulub, 2019-cu il mayın 18-də pul girovu ilə azadlığa çıxıb. 2019-cu il iyunun 25-dən Robert Köçəryan yenidən həbsdədir, sentyabrın 12-dən isə Yerevanın Şenqavit rayonundakı ümumi məhkəmədə mühakimə prosesi gedir. Sabiq prezidentlə birgə general-polkovniklər Seyran Ohanyan, Yuri Xaçaturov və baş nazirin keçmiş müavini Armen Gevorkyan mühakimə olunur.
Robert Köçəryan bu il martın 7-də Yerevandakı “Nairi” Tibb Mərkəzinə aparılmış, martın 8-də “Erebuni” Tibb Mərkəzinə köçürülmüşdü. Onun ürək-damar sistemində problemlərdən (ürək ritminin pozulması, güclü başgicəllənməsi, yüksək qan təzyiqi) əziyyət çəkdiyi açıqlanmışdı.
Aprelin 3-də o, “Erebuni” Tibb Mərkəzində müalicəsini başa vuraraq paytaxtdakı “Kentron” cinayət-icra müəssisəsinə qaytarılmışdı.
