İxrac icmalı
İqtisadi İslahatların Təhlili və Kommunikasiya Mərkəzi ixrac icmalı yayıb. Rəsmi hesabata görə, 2020-ci ilin yanvar-mart aylarında Azərbaycan qeyri-neft sektoru üzrə 429 milyon ABŞ dolları dəyərində məhsul ixrac edib: “2019-cu ilin ilk rübü ilə müqayisədə qeyri-neft ixracı 3,3 faiz artıb, Rusiyaya 134,4 milyon, Türkiyəyə 104,4 milyon, Gürcüstana 42,9 milyon, İsveçrəyə 40,8 milyon, Çinə 12,2 milyon ABŞ dolları dəyərində mal göndərilib.
İxrac edilən qeyri-neft sektoruna aid malların siyahısında pomidor birinci (43,9 milyon ABŞ dolları), pambıq mahlıcı ikinci (42,8 milyon ABŞ dolları), sikkə kəsilməsində istifadə olunmayan, digər emal olunmamış formalarda qızıl üçüncü (36,3 milyon ABŞ dolları) yerdə qərar tutub”.
İlin birinci rübü üzrə meyvə-tərəvəz ixracı 113,3 milyon, plastmas və onlardan hazırlanan məmulatların ixracı 46,4 milyon, pambıq lifi ixracı 43,4 milyon, alüminium və ondan hazırlanan məmulatların ixracı 21,4 milyon, kimya sənayesi məhsullarının ixracı 19,8 milyon, elektrik enerjisinin ixracı 17,8 milyon, qara metallar və onlardan hazırlanan məmulatların ixracı 11,9 milyon, pambıq ipliyi ixracı 8,6 milyon, alkoqollu və alkoqolsuz içkilərin ixracı 4,3 milyon, şəkər ixracı 2,9 milyon dollar göstərilir.
İqtisadi İslahatların Təhlili və Kommunikasiya Mərkəzi 2016-cı ildə yaradılıb. Nizamnaməsinə görə, mərkəzin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.
Qurumun icraçı direktoru postunu Vüsal Qasımlı tutur.
