Sahibkarlara dəstək: yeni hesabat yayılıb
İqtisadiyyat Nazirliyi koronavirus pandemiyasının mənfi təsirinin azaldılması işləri üzrə yeni hesabat yayıb.
Tədbirlərin biri pandemiyadan zərər çəkmiş sahələrdə çalışan muzdlu işçilərin əməkhaqqının müəyyən hissəsinin ödənməsi və fərdi (mikro) sahibkarlara maliyyə dəstəyinin göstərilməsidir.
Pandemiyanın zərər vurduğu fəaliyyət sahələrində sahibkarlıq fəaliyyəti göstərən 300 min fərdi sahibkara maliyyə dəstəyinin göstərilməsi də nəzərdə tutulur.
Novator.az bildirir ki, rəsmi hesabata görə, aprelin 27-nə İqtisadiyyat Nazirliyinə muzdlu işçilərin əməkhaqqının müəyyən hissəsinin ödənməsi üçün 22 min 976 vergi ödəyicisi, maliyyə dəstəyi almaq üçün 73 min 760 fərdi (mikro) sahibkar müraciət edib.
Muzdlu işçilərin əməkhaqqının müəyyən hissəsinin ödənməsi çərçivəsində 178 min 587 işçini əhatə edən 19 min 61 sahibkarın müraciəti araşdırılaraq təsdiqlənib və ayrılacaq maliyyə vəsaitinin bank hesablarına köçürülməsi üçün Maliyyə Nazirliyinə təqdim olunub. İndiyədək təsdiq edilmiş müraciətlər üzrə maliyyə dəstəyinin həcmi 80,72 milyon manatdır.
Fərdi (mikro) sahibkarlara maliyyə dəstəyinin göstərilməsi proqramı çərçivəsində 67 min 497 müraciət araşdırılaraq təsdiqlənib və maliyyə dəstəyinin bank hesablarına köçürülməsi üçün Maliyyə Nazirliyinə təqdim edilib. Təsdiq edilmiş müraciətlər üzrə maliyyə dəstəyinin həcmi 44,42 milyon manatdır.
2019-cu ilin dekabrında Çində üzə çıxan koronavirus xəstəliyi 210 ölkə və əraziyə yayılıb, 211 mindən çox adam ölüb.
Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, ictimai iaşə müəssisələri, şadlıq və mərasim evləri, bir çox ticarət məkanı və məişət xidməti yeri bağlanıb, ölkə ərazisində gediş-gəlişə, ictimai nəqliyyatın hərəkətinə məhdudiyyət qoyulub.
