Neft büdcə qiymətindən nə qədər ucuzdur?
AZƏRTAC-ın 28 aprel məlumatına görə, London birjasında brent markalı neftin barreli 19,30 dollara, Nyu-York birjasında layt markalı neftin barreli 11,33 dollara satılır.
Azərbaycan nefti “AzəriLayt”ın barrelinə 16,25 dollar qiymət qoyulduğu vurğulanır. Bu, büdcə qiymətindən 38,75 dollar aşağı göstəricidir.
Novator.az bildirir ki, Azərbaycanın 2020-ci il büdcəsində neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43 dollarla başlayıb.
Beynəlxalq razılaşmaya əsasən, bu ilin may-iyun aylarında Azərbaycan gündəlik neft hasilatını 554 min barrel, iyul-dekabr aylarında 587 min barrel, 2021-ci ilin yanvar ayından 2022-ci ilin aprelinədək isə 620 min barrel həcmində saxlamalıdır.
Neft mart ayından başlayaraq dünyanı bürüyən koronavirus xəstəliyi fonunda tələbatın azalmasına görə kəskin ucuzlaşıb.
2020-ci ilin ilk üç ayında Azərbaycanın ixracının 89,8 faizi neft-qaz sektoruna aid olub.
Dövlət Neft Fondunun rəsmi hesabatına görə, yanvar-mart aylarında neft və qaz sazişləri üzrə 3 milyard 772,1 milyon manat gəlir əldə edilib.
