Operativ qərargahın 27 aprel məlumatı
Nazirlər Kabineti yanında operativ qərargahın aprelin 27-də yaydığı məlumata görə, Azərbaycanda daha 33 nəfər koronavirus infeksiyasına yoluxub, 23 nəfər sağalaraq xəstəxanadan buraxılıb, 1960-cı il təvəllüdlü bir xəstə vəfat edib.
Hesabata əsasən, indiyədək ölkədə 1678 nəfərin koronavirus infeksiyasına yoluxduğu müəyyən edilib, onların 1162-si müalicə olunaraq sağalıb, 22-si dünyasını dəyişib.
2019-cu ilin dekabrında Çində üzə çıxan koronavirus xəstəliyi 210 ölkə və əraziyə yayılıb, 207 mindən çox adam ölüb.
Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, bir çox ticarət və məişət xidməti məkanı bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
