Hər il ABŞ şəhərlərində 36 milyon ağac məhv olur
Hər il ABŞ şəhərlərində 36 milyon ağac məhv olur. Novator.az xəbər verir ki, bunu ABŞ Meşə Xidmətinin apardığı araşdırma üzə çıxarıb.
Meşə Xidmətində çalışan alim Devid Novak deyib ki, belə davam etsə, şəhərlər daha da istiləşəcək, çünki yayın qızmar çağında ağaclar temperaturu 10 dərəcə aşağı sala bilir. Eyni zamanda ağacların azalması şəhərlərin çirklənməsinə, sakinlərin həyatı üçün qeyri-sağlam mühitin yaranmasına gətirib çıxaracaq.
Devid Novak bildirib ki, ağac örtüyünün azalmasına qasırğalar, tornadolar, yanğınlar, həşəratlar və müxtəlif xəsəliklər səbəb olur. Bundan başqa, insan faktoru da ağacların məhvinə gətirib çıxarır: “Köhnə şəkillərdə gördüyümüz ağacla örtülmüş yerlərdə indi avtomobil dayanacaqları və binalar durur. ABŞ əhalisinin 80 faizindən çoxu şəhərdə yaşayır. Biz daima yol çəkirik, bina tikirik, bir ağacı kəsib yerinə başqasını əkirik. Bunlar isə təkcə həmin yerə yox, bütövlükdə regiona təsir edir”.
Meşə Xidmətinin tədqiqatında atmosfer çirklənməsinin qarşısının alınması və enerjinin qorunmasında ağacların rolu məsələsinə də önəm verilib.
Devid Novak ağacların cəmiyyətə verdiyi əsas faydaları sadalayarkən deyib ki, ağaclar istini, enerji tullantılarını, daşqınları, səs-küyü azaldır, havanı təmizləyir, suyun keyfiyyətini yaxşılaşdırır, ultrabənövşəyi şüaları dəf edir, estetik gözəllik yaradır, insanın səhhətinə müsbət təsir göstərir. Eyni zamanda ağaclar çöl heyvanlarının həyat vərdişlərini saxlamasına kömək edir.
İlkin Nizami
