Mehmanxanaların gəliri 15,8 faiz azalıb
Dövlət Statistika Komitəsi mehmanxana və bu tipli müəssisələrin fəaliyyəti haqqında hesabat yayıb. Novator.az bildirir ki, rəsmi açıqlamaya görə, koronavirus infeksiyasının yayılması üzündən göstəricilərdə azalma var: “Ölkənin mehmanxanalarında bu ilin yanvar-mart aylarında keçirilmiş gecələmələrin sayı ötən ilin eyni dövrü ilə müqayisədə 13 faiz azalaraq 474,6 min olub. Mart ayında gecələmələrin sayı fevral ayına nisbətən 2,7 dəfə, ötən ilin mart ayına nisbətən 2,9 dəfə düşüb.
İlin birinci rübündə mehmanxanalarda keçirilmiş gecələmələrin 55,4 faizi Bakıda, 9,8 faizi Qusarda, 8,4 faizi Qəbələdə, 5,1 faizi Naftalanda, 4,6 faizi Qubada, 3,8 faizi Naxçıvan Muxtar Respublikasında, 2 faizi Lənkəranda, 1,7 faizi Şabranda, 1 faizi Mingəçevirdə, 0,8 faizi Gəncədə, 7,4 faizi digər şəhər və rayonlarda rəsmiləşib.
Əcnəbilər və vətəndaşlığı olmayan şəxslərin mehmanxanalarda keçirdiyi gecələmələrin sayı əvvəlki ilin birinci rübünə nisbətən 16,7 faiz azalıb.
Mehmanxanaların gəlirləri əvvəlki ilin birinci rübünə nəzərən 15,8 faiz azalaraq 60 milyon manat olub”.
