Prezident töhmətinin hüquqi əsası
Prezident İlham Əliyev 2020-ci il aprelin 21-də sərəncam imzalayaraq İsmayıllı Rayon İcra Hakimiyyətinin başçısı Nahid Bağırova töhmət elan edib. Töhmət Nahid Bağırovun Azərbaycanda koronavirus infeksiyasının yayılmasının qarşısının alınması məqsədilə tətbiq olunmuş xüsusi karantin rejimi qaydalarını pozması ilə əsaslandırılıb.
Azərbaycan Konstitusiyasının 124-cü maddəsinə görə, yerlərdə icra hakimiyyətini yerli icra hakimiyyətlərinin başçıları həyata keçirirlər. İcra hakimiyyəti başçılarını prezident vəzifəyə təyin və vəzifədən azad edir.
İcra hakimiyyəti başçıları dövlət qulluqçusu sayılırlar.
Novator.az normativ hüquqi aktların vahid internet elektron bazasına (www.e-qanun.az) nəzər salaraq müəyyən edib ki, prezident İlham Əliyev 2017-ci ildə də dövlət qulluqçusuna töhmət verib. 21 avqust 2017-ci ildə imzalanmış sərəncamla prezidentin işlər müdiri Oqtay Şahbazov töhmət alıb. Töhmət Oqtay Şahbazovun xidməti vəzifəsinin icrasında yol verdiyi nöqsanla əsaslandırılıb.
Prezidentin İşlər İdarəsi prezidentin və onun administrasiyasının fəaliyyətinin maddi-texniki və maliyyə təminatı ilə məşğul olur.
Novator.az bildirir ki, 21 avqust 2017-ci il və 21 aprel 2020-ci ildəki töhmət sərəncamlarını imzalayanda prezident Azərbaycan Respublikası Konstitusiyasının 109-cu maddəsinin 32-ci bəndini rəhbər tutduğunu bəyan edib. Həmin bənd prezidentin Milli Məclisin və məhkəmə orqanlarının səlahiyyətlərinə aid edilməyən məsələləri icra qaydasında həll etmək səlahiyyətini nəzərdə tutur.
Dövlət qulluqçusuna töhmət verilməsini isə “Dövlət qulluğu haqqında” qanun tənzimləyir. Həmin qanuna əsasən, dövlət qulluqçusuna həvalə olunmuş vəzifələrin yerinə yetirilməməsi və ya lazımi şəkildə yerinə yetirilməməsi intizam məsuliyyətinə səbəb olur. İntizam tənbeh tədbirləri sırasında ilk yerdə töhmət dayanır.
