Neft büdcə qiymətindən 40 dollara yaxın ucuzdur
Energetika Nazirliyinin 22 aprel hesabatına görə, London birjasında brent markalı neftin barreli 16,45 dollara, Nyu-York birjasında layt markalı neftin barreli 10,76 dollara satılır.
Azərbaycan nefti “AzəriLayt”ın barrelinə 15,85 dollar qiymət qoyulduğu vurğulanır. Bu, büdcə qiymətindən 39,15 dollar aşağı göstəricidir.
2020-ci ilin dövlət büdcəsində neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43 dollarla başlayıb.
Yanvarın gündəlik neft hasilatı 769 min barrel, fevralın hasilatı 750,6 min barrel, martın hasilatı 763,9 min barrel göstərilib.
Beynəlxalq razılaşmaya əsasən, bu ilin may-iyun aylarında Azərbaycan gündəlik neft hasilatını 554 min barrel, iyul-dekabr aylarında 587 min barrel, 2021-ci ilin yanvar ayından 2022-ci ilin aprelinədək isə 620 min barrel həcmində saxlamalıdır.
Neft mart ayından başlayaraq dünyanı bürüyən koronavirus xəstəliyi fonunda tələbatın azalmasına görə kəskin ucuzlaşıb.
