Baytarlıq sistemi dəyişir
Prezident İlham Əliyev baytarlıq sahəsində həyata keçirilən xidmətləri yeniləyən fərman verib. Aprelin 22-də imzalanan fərman ölkədə özəl baytarlıq xidməti müəssisələri vasitəsilə baytarlıq xidmətləri göstərilməsinə mərhələli keçidi də nəzərdə tutur.
Sənədə əsasən, xüsusi təhlükəli heyvan xəstəliklərinə qarşı dövlət büdcəsindən maliyyələşdirilən baytarlıq xidmətləri Kənd Təsərrüfatı Nazirliyi yanında Aqrar Xidmətlər Agentliyi ilə müqavilə bağlanması yolu ilə həyata keçiriləcək.
Nazirlər Kabineti iki ay müddətində xüsusi təhlükəli heyvan xəstəliklərinin profilaktikası, diaqnostikası, müalicəsi və ləğvi məqsədilə dövlət büdcəsindən maliyyələşdirilən, dövlət sifarişi ilə göstəriləcək baytarlıq xidmətlərinin siyahısını təsdiqləməli; karantin rejiminin tətbiqi və ya zərərli orqanizmlərin ləğvi, xüsusi təhlükəli heyvan xəstəliklərinin profilaktikası, diaqnostikası, müalicəsi və ləğvi ilə əlaqədar zərər çəkmiş hüquqi və fiziki şəxslərə dəymiş maddi ziyanın əvəzinin ödənilməsi mexanizmini müəyyən etməli; sahə baytarlıq məntəqələrinin inzibati binalarının və digər dövlət əmlakının müqavilə bağlayan baytarlıq subyektlərinə icarəyə verilməsi ilə bağlı tədbirlər görməlidir.
Kənd Təsərrüfatı Nazirliyinə tabeliyindəki baytarlıq idarələrinin fəaliyyətinin təkmilləşdirilməsi və həmin idarələrin strukturuna daxil olan sahə baytarlıq məntəqələrinin 2022-ci ilin sonunadək mərhələli şəkildə ləğvi ilə bağlı tədbirlər görmək tapşırılıb.
