İqtisadiyyat Nazirliyinin Kollegiyası yeniləndi
Nazirlər Kabineti İqtisadiyyat Nazirliyinin Kollegiyasının tərkibini yeniləyib. Novator.az bildirir ki, qərara əsasən, nazirin sədrlik etdiyi kollegiyanın tərkibi belə müəyyən olunub:
iqtisadiyyat nazirinin birinci müavini
iqtisadiyyat nazirinin müavinləri
Naxçıvan Muxtar Respublikasının iqtisadiyyat naziri
İqtisadiyyat Nazirliyi yanında Dövlət Vergi Xidmətinin rəisi
İqtisadiyyat Nazirliyi yanında Əmlak Məsələləri Dövlət Xidmətinin rəisi
İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi.
Ötən il oktyabrın 23-də Vergilər Nazirliyi, Əmlak Məsələləri Dövlət Komitəsi və Antiinhisar və İstehlak Bazarına Nəzarət Dövlət Agentliyi İqtisadiyyat Nazirliyinin strukturuna daxil edilib. Struktur belə müəyyən olunub: Aparat (şöbələr və sektorlar); Dövlət Vergi Xidməti; Əmlak Məsələləri Dövlət Xidməti; Antiinhisar və İstehlak Bazarına Nəzarət Dövlət Xidməti; regional bölmələr; Azərbaycanın xarici ölkələrdə fəaliyyət göstərən səfirlik və konsulluqlarında ticarət nümayəndələrinin aparatları.
30 dekabr 2019-cu ildə rəsmiləşən yeni əsasnaməyə görə, İqtisadiyyat Nazirliyi Azərbaycanın iqtisadi siyasətinin formalaşdırılması, makroiqtisadi proqnozların hazırlanması, iqtisadi inkişafın və iqtisadi artımın təmin edilməsi üçün əlverişli şərait yaradılması, investisiya fəaliyyətinin təşviqi, sahibkarlığın və sənayenin inkişafı, lisenziya və icazə sisteminin tənzimlənməsi, inhisarçılığın qarşısının alınması, haqsız rəqabətin aradan qaldırılması, istehlakçıların hüquqlarının qorunması, dövlət vəsaiti hesabına malların (işlərin və xidmətlərin) satın alınması, dövlət büdcəsinə vergilərin, habelə qanunla və prezident aktı ilə nazirliyin səlahiyyətlərinə aid edilmiş digər icbari ödənişlərin vaxtında və tam yığılması, dövlət əmlakının idarə edilməsi, onun özəlləşdirilməsi, torpaqların dövlət idarəetməsinin təşkili, daşınmaz əmlakın dövlət reyestrinin və vahid dövlət kadastrının aparılması sahələrində dövlət siyasətini və tənzimləməsini həyata keçirən mərkəzi icra hakimiyyəti orqanıdır.
İqtisadiyyat nazirinin 1 birinci müavini və 5 müavini var. Nazirin və müavinlərin təyinatı ölkə prezidentinin səlahiyyətindədir.
