Sərmayə incəlikləri
Novator.az əsas kapitala 2020-ci ilin ilk rübündə yönəldilmiş vəsaitlər üzrə rəsmi göstəricilərə nəzər salıb.
Dövlət Statistika Komitəsinin rəsmi hesabatına görə, yanvar-mart aylarında Azərbaycanın iqtisadi və sosial sahələrinin inkişafı üçün əsas kapitala 2 milyard 929,4 milyon manat vəsait yönəldilib, ümumi sərmayənin 69 faizi məhsul istehsalı sahələrinin, 21,1 faizi xidmət sahələrinin, 9,9 faizi yaşayış evlərinin tikintisinin payına düşüb.
Sərmayədə dövlət sektorunun payı 35,2 faiz, qeyri-dövlət sektorunun payı 64,8 faiz göstərilir.
Rəsmi açıqlamaya əsasən, daxili mənbələrdən əsas kapitala yönəldilmiş vəsaitin dəyəri ümumi sərmayənin 58,2 faizinə bərabər olub, müəssisə və təşkilatların vəsaitləri 1 milyard 959,9 milyon manat, bank kreditləri 130,9 milyon manat, büdcə vəsaitləri 519 milyon manat, büdcədənkənar dövlət fondlarının vəsaitləri 52,1 milyon manat, əhalinin şəxsi vəsaitləri 188,9 milyon manat, sair vəsaitlər 78,6 milyon manat təşkil edib.
Xarici ölkələr və beynəlxalq təşkilatların vəsaitləri hesabına əsas kapitala yönəldilmiş vəsaitin 90,3 faizinin Böyük Britaniya, ABŞ, Yaponiya, Türkiyə, Norveç, İsveçrə, Malayziya, Rusiya və İran sərmayədarlarına məxsus olduğu vurğulanır.
