Ramazan ayı: Qazılar Şurası bəzi mərasimləri keçirməməyə çağırır
Qafqaz Müsəlmanları İdarəsinin Qazılar Şurası fətva yayıb. Fətvaya görə, Ramazan ayının 1-i miladi tarixlə aprelin 25-nə təsadüf edir.
Fitr bayramı (Şəvval ayının 1-i) mayın 24-də qeyd olunacaq. Fitrə zəkatının adambaşına 5-10 manat dəyərində verilməsi məsləhət görülür.
Ölkədə koronavirus infeksiyasına görə xüsusi karantin rejiminin tətbiq olunduğunu, bu səbəbdən məscid və ziyarətgahlarda ibadətlərin də müvəqqəti dayandırıldığını xatırladan Qafqaz Müsəlmanları İdarəsinin Qazılar Şurası hazırkı vəziyyətdə şəriətdə vacib olmayan, sadəcə adət-ənənələrə söykənən dini mərasimlərin (ehsan, mövlud və s.) keçirilməməsini tövsiyə edir: “Şəri baxımdan vacib olan dəfn mərasimləri şəriət qaydalarına əməl edilməsi şərtilə karantin dövründə məhdud çərçivədə həyata keçirilməlidir. İftar süfrəsinin də hər bir evdə yalnız ailə üzvlərinin iştirakı ilə açılmasına çağırırıq”.
