Koronavirus: aprelin 20-nə olan vəziyyət
Nazirlər Kabineti yanında operativ qərargahın aprelin 20-də yaydığı məlumatda deyilir ki, ölkədə daha 38 nəfər koronavirus infeksiyasına yoluxub, 79 nəfər sağalaraq xəstəxanadan buraxılıb.
Rəsmi hesabata görə, ümumilikdə ölkədə 1436 nəfər koronavirusa yoluxub, onların 791-i müalicə olunaraq sağalıb, 19-u dünyasını dəyişib. Hazırda xüsusi rejimli xəstəxanalarda 626 nəfər var, onların 16-nın vəziyyəti ağırdır.
2019-cu ilin dekabrında Çində üzə çıxan, pnevmoniyanın yeni növü olan koronavirus xəstəliyi 210 ölkə və əraziyə yayılıb, 166 mindən çox adam ölüb.
Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
