“Azərenerji”də yenilik
Aprelin 20-si Bakıda “Azərenerji” Açıq Səhmdar Cəmiyyətinin yenidən qurulan baş idarəetmə, elm, tədris və laboratoriya kompleksi açılıb. AZƏRTAC xəbər verir ki, prezident İlham Əliyev açılış mərasimində iştirak edib.
Arayışa görə, 1986-cı ildə istifadəyə verilən bina əsaslı təmir olunaraq yenidən qurulub.
Binada fəaliyyət göstərəcək Baş İdarəetmə Mərkəzi vasitəsilə enerji sisteminin avtomatik idarə edilməsinin, idxal-ixrac proseslərinin, tənzimləmələrin həyata keçirilməsi nəzərdə tutulur. Əməliyyatlar insan müdaxiləsi olmadan məsafədən həyata keçirilir.
Burada yeni SCADA sistemi qurulur. Yeni sistem əsas və Ehtiyat Dispetçer İdarəetmə Mərkəzindən, 7 regional monitorinq mərkəzindən ibarət olmaqla ilkin mərhələdə 21 elektrik stansiyasını və 80 yarımstansiyanı əhatə edəcək.
On ədəd nəzəri və praktik trenajor zalının yaradıldığı kompleksin Tədris Mərkəzində enerji sistemində çalışan şəxslərə yeni texnika və texnologiyanın öyrədilməsi və onların idarə edilməsi tədris olunacaq.
Binada 500 nəfərlik Energetiklərin Mədəniyyət Mərkəzi yaradılıb.
Yenidənqurmadan sonra “Azərenerji” ASC-nin mərkəzi aparatı bu binaya köçürülüb.
Burada Azərbaycan Energetika İnstitutu da fəaliyyət göstərir.
Kompleksin Laboratoriya Mərkəzindəki laboratoriyalarda geotexnika, geodeziya, inşaat, kimya, metalların və inşaat materiallarının sınağını və digər laborator işləri görmək və onları sertifikatlaşdırmaq mümkün olacaq.
Kompleksin binasında tibbi maskaların istehsalı üçün xüsusi otaq da ayrılıb, zəruri avadanlıq quraşdırılıb.
Prezident İlham Əliyev “Azərenerji” Açıq Səhmdar Cəmiyyətinin bir qrup əməkdaşı ilə görüşüb, görüşdə çıxış edib.
