Qeyri neft-qaz ixracı real ifadədə 3,4 faiz azalıb
2020-ci ilin yanvar-fevral aylarında Azərbaycanın hüquqi və fiziki şəxsləri 144 ölkədəki tərəfdaşları ilə ticarət əməliyyatları həyata keçirib, 85 ölkəyə məhsul ixrac olunub, 136 ölkədən məhsul alınıb. Novator.az-ın məlumatına görə, hesabatı yayan Dövlət Statistika Komitəsi bildirir ki, iki ayın ixracı 3 milyard 95,9 milyon dollar, idxalı 1 milyard 787,1 milyon dollar dəyərində rəsmiləşib: “2019-cu ilin yanvar-fevral ayları ilə müqayisədə xarici ticarət dövriyyəsi faktiki qiymətlərlə 6,3 faiz, real ifadədə 14,8 faiz, o cümlədən idxal 34,5 faiz, ixrac 1 faiz azalıb.
Yanvar-fevral aylarında qeyri neft-qaz məhsullarının ixracı 2019-cu ilin yanvar-fevral aylarına nisbətən faktiki qiymətlərlə 5,2 faiz artıb, real ifadədə 3,4 faiz azalaraq 295,8 milyon dollar təşkil edib.
Qeyri neft-qaz məhsulları üzrə ixracın dəyərində Rusiya (29,8 faiz), Türkiyə (25,5 faiz), Gürcüstan (11,8 faiz), İsveçrə (9,7 faiz) öndə olub”.
