Mərkəzi Bankın sədri postunda qaldı
Elman Rüstəmov prezident İlham Əliyevin 16 aprel sərəncamı ilə yenidən Mərkəzi Bankın sədri postuna təyinat alıb.
Mərkəzi Bankın İdarə Heyəti üzvlərinin vəzifəyə təyin və vəzifədən azad edilməsi parlamentin, İdarə Heyəti üzvləri sırasından Mərkəzi Bankın sədrini seçmək dövlət başçısının səlahiyyətindədir.
Milli Məclis aprelin 9-da prezident İlham Əliyevin təqdimatına baxaraq Elman Rüstəmovu yenidən Mərkəzi Bankın İdarə Heyətinin üzvü təyin etmişdi.
Novator.az bildirir ki, Elman Rüstəmov 1952-ci ildə Cəbrayıl rayonunda doğulub. Azərbaycan Xalq Təsərrüfatı İnstitutunu (indiki Dövlət İqtisad Universiteti) bitirib, həmçinin aspirantura və doktorantura təhsilləri alıb. İqtisad elmləri doktorudur.
Azərbaycan Dövlət Plan Komitəsi yanında Elmi-Tədqiqat İqtisadiyyat İnstitutunda iqtisadçısı, böyük iqtisadçı, bölmə müdiri vəzifələrində çalışıb, Azərbaycan Yüngül Sənaye Nazirliyinin Bakı Zərif-Mahud İstehsalat Birliyində iqtisadiyyat idarəsinin rəisi olub, Prezident Aparatında böyük məsləhətçi postu tutub.
1992-ci ildə Milli Bankın İdarə Heyəti sədrinin birinci müavini vəzifəsinə təyinat alan Elman Rüstəmov 1995-ci ildən sədr postundadır.
Mərkəzi Bank 2009-cu ilədək Milli Bank adlanıb.
