Daha bir cəbhəçi cəza aldı
Xətai Rayon Məhkəməsi AXCP fəalı, partiya sədri Əli Kərimlinin mühafizəçisi Niyaməddin Əhmədova 30 sutka inzibati həbs cəzası kəsib. Qərar aprelin 16-da çıxarılıb. Fəal polis işçisinin qanuni tələbinə qəsdən tabe olmamaq və karantin rejiminin tələbini pozmaqda təqsirli bilinib.
Azadliq.org-un məlumatına görə, Niyaməddin Əhmədov aprelin 15-də tutulub.
Novator.az bildirir ki, son vaxtlar daha bir necə AXCP fəalı tutulub və ya cinayət məsuliyyətinə cəlb olunub.
Martın 22-si Cəlilabadda tutulan AXCP üzvü Anar Məlikova karantin rejimini pozmaq ittihamı ilə 10 sutka inzibati həbs cəzası verilib.
Martın 24-ü AXCP üzvü Zamin Salayevə Salyanda qəsdən sağlamlığa yüngül zərər vurma ittihamı ilə cinayət işi açılıb.
Aprelin 8-i AXCP sədrinin köməkçisi, “Azadlıq” qəzetinin əməkdaşı Faiq Əmirli Bakıda tutularaq karantin rejimi qaydalarını pozmaq ittihamı ilə 30 sutka inzibati həbsə məhkum edilib.
Aprelin 9-u AXCP fəalı, partiya sədrinin mühafizəçisi Ruslan Əmirov Bakıda tutularaq karantin rejimi qaydalarını pozmaq ittihamı ilə 30 sutka inzibati həbs cəzası alıb.
Aprelin 10-u AXCP üzvü Nicat Abdullayev Bakıda tutularaq polisin qanuni tələbinə qəsdən tabe olmamaq ittihamı ilə 30 sutka inzibati həbsə məhkum edilib.
Aprelin 13-ü Bakıda “Azadlıq” qəzetinin əməkdaşı, AXCP üzvü Təzəxan Mirələmliyə xuliqanlıq ittihamı ilə cinayət işi qaldırılıb.
Həmin gün AXCP üzvü Baba Süleyman Bakıda tutularaq karantin rejimini pozmaq ittihamı ilə 30 sutka inzibati həbs cəzası alıb.
