Xarici ticarətin üç ayı
2020-ci ilin üç aylıq xarici ticarət statistikası bəlli olub. Novator.az bildirir ki, Dövlət Gömrük Komitəsinin hesabatına görə, yanvar-mart aylarında Azərbaycanın xarici ticarət əməliyyatlarının həcmi 6,8 milyard dolları ötüb, 4,2 milyard dollardan çox ixrac, 2,6 milyard dollardan çox idxal qeydə alınıb.
153 ölkə ilə ticarət əməliyyatı aparıldığı, gömrük orqanlarının büdcəyə 991 milyon manatdan çox vəsait ödədiyi vurğulanır.
Statistikaya əsasən, ixracın 6,1 faizi MDB ölkələrinin, 63 faizə yaxını Avropa İttifaqı ölkələrinin, 30 faizdən çoxu digər ölkələrin payına düşüb.
İdxalda MDB-nin payı 24,7 faiz, Avropa İttifaqının payı 20,1 faiz, digər ölkələrin payı 55 faizdən çox göstərilir.
Üç ayda əsas tərəfdaş İtaliya olub, bu ölkə ilə ticarət dövriyyənin 28,4 faizi həcmində rəsmiləşib.
İxracda əsas ölkə İtaliya (43,4 faiz), idxalda Rusiyadır (16,4 faiz).
Hesabata görə, ixracın 89,8 faizi neft-qaz sektoruna aiddir.
İdxalın 22,1 faizi maşın, mexanizm, elektrik aparatları, avadanlıqlar və onların hissələri, 15,7 faizi nəqliyyat vasitələri və onların hissələri, 13,5 faizi yeyinti məhsulları, 11 faizi qara metallar və onlardan hazırlanan məmulatlar kimi rəsmiləşib.
