“Rubik Mona Liza” 480 min avroya satılıb
“İnvayder” (Qəsbkar) ləqəbli fransız rəssamın yaratdığı “Rubik Mona Liza” 480 min avroya satılıb.
Rəssam “Rubik Mona Liza”nı 2005-ci ildə 330 rubik kubundan (kubik-rubik) hazırlayıb. Əsər Parisdə keçirilən hərracda başlanğıc qiymətindən dörd qat baha satılıb.
“İnvayder” keramika-kafel mozaika əsərləri ilə məşhurlaşmış küçə rəssamlarındandır. O, əsl adını və özünü gizlədir. Tanımasınlar deyə maska taxır və gecələr işləyir. Fotolarında və ya müsahibələrində də onun üzünü görmək olmur.
“Rubik Mona Liza”da, adından da bəlli olduğu kimi, rubik kubları vasitəsilə Leonardo da Vinçinin “Mona Liza”sı canlandırılıb.
“Mona Liza” italiyalı rəssam Leonardo da Vinçinin bütün dünyada məşhur rəngkarlıq əsəridir və İntibah dövrünün şah əsəri hesab olunur. Rəsmin əsas cəhətləri təsvirin müəmmalı ifadəsi, formanın incə modelləşdirilməsi və atmosfer illüziyası ilə xarakterizə edilir. Ən son araşdırmalar göstərir ki, Leonardo bu əsəri dörd ilə (1513-1517) çəkib.
Əsər 1797-ci ldən Parisdə Luvr Muzeyində saxlanır.
“Mona Liza” dünyanın ən bahalı rəsmlərindən biridir və yüksək sığorta dəyərinə görə Ginnesin rekordlar kitabına düşüb. Əsərin sığorta dəyəri 1962-ci ildə 100 milyon dollar olub. Hazırda 650 milyon dollardır.
İlkin Nizami
