İşğalçı rejimdə Araik dövrü
Azərbaycan torpaqlarında qurulan işğalçı Dağlıq Qarabağ rejimində növbəti seçki tamaşası başa çatıb.
Martın 31-i Dağlıq Qarabağda “prezident və parlament seçkiləri” keçirilib. Proporsional sistemlə seçilən 33 nəfərlik “parlamentə” 5 siyasi qüvvə düşüb, Araik Arutunyan və Masis Mailyan isə “prezident seçkisinin” ikinci turuna çıxıblar.
Novator.az-ın məlumatına görə, aprelin 14-də keçirilən ikinci turda Araik Arutunyan 39,8 min səslə qalib gəlib. Onun rəqibi, rejimin “xarici işlər naziri” Masis Mailyan 5,4 min səs toplayıb.
1973-cü ildə Xankəndidə doğulan Araik Arutunyan Azərbaycana qarşı işğalçı müharibənin iştirakçısıdır.
Xankəndidəki “Arsax Dövlət Universiteti”nin iqtisadiyyat fakültəsini və həmin təhsil ocağının aspiranturasını bitirib. Texnika elmləri namizədidir.
2007-2017-ci illərdə Dağlıq Qarabağ rejiminin “baş naziri”, 2017-2018-ci illərdə “dövlət naziri” olub.
Azad Vətən Partiyasının sədridir.
1988-ci ilin fevral ayında ermənilər Azərbaycanın Dağlıq Qarabağ Muxtar Vilayətinin Ermənistanın tərkibinə verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu ələ keçirib.
İşğalçı Dağlıq Qarabağ rejimində 1991-ci ildən bəri daha 6 “parlament seçkisi” və 5 “prezident seçkisi”, 7 “bələdiyyə seçkiləri”, 3 “referendum” keçirilib.
Müxtəlif illərdə rejimə Leonard Petrosyan (iki dəfə), Artur Mkrtçyan, Georgi Petrosyan, Robert Köçəryan, Arkadi Qukasyan rəhbərlik edib.
Hazırda rejimin başında Bako Saakyan dayanır.
