Son dövrün cəzaları
Novator.az son vaxtlar tutulan, məsuliyyətə cəlb olunan fəalların siyahısına nəzər salıb.
Martın 21-i Müsəlman Birliyi Hərəkatının üzvü Samir Babayev Bakıda tutularaq polisin qanuni tələbinə qəsdən tabe olmamaq ittihamı ilə 30 sutka inzibati həbs cəzası alıb.
Martın 22-si Milli Şuranın Koordinasiya Mərkəzinin üzvü, müsavatçı Tofiq Yaqublu Bakıda silah qismində istifadə olunan əşyalardan istifadə edilməklə xuliqanlıq ittihamı əsasında tutulub, onun barəsində 3 aylıq həbs qətimkan tədbiri seçilib.
Həmin gün Cəlilabadda tutulan AXCP üzvü Anar Məlikova karantin rejimini pozmaq ittihamı ilə 10 sutka inzibati həbs cəzası verilib.
Martın 24-ü AXCP üzvü Zamin Salayevə Salyanda qəsdən sağlamlığa yüngül zərər vurma ittihamı ilə cinayət işi açılıb.
Martın 30-u hüquq müdafiəçisi və jurnalist Elçin Məmməd Sumqayıtda xeyli miqdarda ziyan vurmaqla oğurluq ittihamı ilə tutulub, onun barəsində 3 aylıq həbs qətimkan tədbiri seçilib.
Aprelin 6-sı Azərbaycan Demokratiya və Rifah (ADR) Hərəkatının üzvü Şakir Məmmədov Sumqayıtda tutularaq polisin qanuni tələbinə qəsdən tabe olmamaq ittihamı ilə 15 sutka inzibati həbsə məhkum edilib.
Aprelin 7-si ADR Hərəkatının üzvü Vəfadar Əliyev Bakıda tutularaq polisin qanuni tələbinə qəsdən tabe olmamaq ittihamı ilə 30 sutka inzibati həbs cəzası alıb.
Aprelin 8-i AXCP sədri Əli Kərimlinin köməkçisi, “Azadlıq” qəzetinin əməkdaşı Faiq Əmirli Bakıda tutularaq karantin rejimi qaydalarını pozmaq ittihamı ilə 30 sutka inzibati həbsə məhkum edilib.
Aprelin 9-u AXCP fəalı, partiya sədrinin mühafizəçisi Ruslan Əmirov Bakıda tutularaq karantin rejimi qaydalarını pozmaq ittihamı ilə 30 sutka inzibati həbs cəzası alıb.
Həmin gün Abşeron rayonunda tutulan 7gun.az saytının müxbiri Natiq İsbatova polisin qanuni tələbinə qəsdən tabe olmamaq ittihamı ilə 30 sutka inzibati həbs cəzası verilib.
Aprelin 10-u AXCP üzvü Nicat Abdullayev Bakıda tutularaq polisin qanuni tələbinə qəsdən tabe olmamaq ittihamı ilə 30 sutka inzibati həbsə məhkum edilib.
Aprelin 13-ü Bakıda “Azadlıq” qəzetinin əməkdaşı, AXCP üzvü Təzəxan Mirələmliyə xuliqanlıq ittihamı ilə cinayət işi qaldırılıb.
Həmin gün AXCP üzvü Baba Süleyman Bakıda tutularaq karantin rejimini pozmaq ittihamı ilə 30 sutka inzibati həbs cəzası alıb.
Bunlardan əlavə mart ayında sosial şəbəkə fəalları İntiqam Bayramov Bakıda, Araz Quliyev Şirvan şəhərində tutularaq 30 sutka inzibati həbsə məhkum ediliblər, AXCP üzvü Aqil Hümmətov Bakıda ruhi əsəb dispanserinə salınıb.
