Operativ qərargaha informasiya iradı
“Nazirlər Kabineti yanında operativ qərargahın xəbər siyasəti informasiya əldə edilməsi ilə bağlı qanunvericiliyə uyğun deyil”. Media hüquqçusu Xalid Ağalıyev belə yazır.
Bu il fevralın 27-də yaradılan qərargah koronavirus xəstəliyinin Azərbaycanda yarada biləcəyi təhlükənin qarşısının alınması, profilaktik və təxirəsalınmaz tədbirlər görməklə məşğul olur.
Novator.az-ın məlumatına görə, Xalid Ağalıyev özünün “Facebook” səhifəsində mediada yayılan bilgilərə, o cümlədən jurnalistlər Şəmşad Ağa və Seymur Kazımovun yazılarına əsaslanaraq qeyd edir ki, operativ qərargah ictimai tələbat olan bilgiləri əvvəlcə hansısa meyarlar əsasında seçdiyi media qurumlarına ötürür, yalnız bundan sonra Nazirlər Kabinetinin sözçüsü həmin bilgiləri özünün şəxsi sosial media hesablarından paylaşır: “Yenilik deyil. Əvvəllər də informasiya sahibi olan dövlət qurumları mediaya, jurnalistlərə münasibətdə belə ayrı-seçkiliyə yol veriblər. İnformasiya öncə rəsmi mediaya və ya hökumətin sevimlisi olan agentliklərə ötürülür, ardınca həmin bilgi hamının əli çatan yerə, informasiya sahibinin internet resursuna daxil edilir – tez-tez rast gəlinən praktikadır.
Qanunsuzdur. Özəlliklə hazırkı fövqəladəyə oxşar durumda informasiya təminatına cavabdeh olan quruluş və səlahiyyətlilər daha diqqətli, daha həssas olmalıdır. İnformasiyaların hamıya sərbəst, maneəsiz və bərabər şərtlərlə çatdırılması təmin olunmalıdır.
Bu, bizim arzumuz deyil, “İnformasiya əldə etmək haqqında” qanunun Nazirlər Kabineti yanında operativ qərargah daxil olmaqla bütün rəsmi qurumların, ictimai bilgi sahiblərinin üzərinə qoyduğu vəzifədir. Həmin qanunun 10-cu maddəsində yazılır ki, informasiya sahibi öz informasiya ehtiyatlarından hər kəsin sərbəst, maneəsiz və hamı üçün bərabər şərtlərlə informasiya əldə etmək hüququnu təmin etməyə borcludur. Burdan çıxan nəticə odur ki, informasiya sahibi informasiyanı ilk olaraq özünün internet resursuna yerləşdirməli, ona sərbəst, maneəsiz və hamı üçün bərabər şərtlərlə çıxışı təmin etməlidir”.
