Belarus Avropanın qapısını aralayır
Belarus prezidenti Aleksandr Lukaşenko aprelin 14-də Avropa İttifaqı ilə sadələşdirilmiş viza rejimi və readmissiya sazişlərini imzalayıb.
Novator.az-ın məlumatına görə, 2020-ci ilin yanvarında Brüsseldə imzalanan sənədlər Belarus parlamentinin hər iki palatasında ratifikasiya olunub.
Sadələşdirilmiş viza sazişi vizanın qiymətinin 60 avrodan 35 avroya endirilməsini, müddətinin il ərzində 90 gündən 180 günə artırılmasını nəzərdə tutur.
Readmissiya haqda sazişə əsasən, tərəflər ərazilərində qanuni yaşamayan vətəndaşlarını, üçüncü ölkə vətəndaşlarını və vətəndaşlığı olmayan şəxsləri geri qəbul etməlidir.
Sənədlər Avropa İttifaqının qanunverici orqanı olan Avropa Parlamentinin təsdiqindən sonra qüvvəyə minə bilər.
1957-ci ildə yaradılmış Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Belarus Avropa İttifaqının Şərq tərəfdaşlığı proqramının üzvüdür. 2009-cu ildə elan olunmuş proqram Ukrayna, Moldova, Azərbaycan, Gürcüstan və Ermənistanı da əhatə edir.
Səidə Hüseynova
