22 min tələbənin təhsil haqqı ödənəcək
Koronavirus pandemiyasının sosial həyata mənfi təsirinin azaldılması istiqamətində tədbirlər planını icra edən Nazirlər Kabinetinin 13 aprel qərarına görə, Azərbaycanın təhsil müəssisələrində ödənişli əsaslarla əyani təhsil alan (təkrar ali və orta ixtisas təhsili istisna olmaqla) və sosial baxımdan həssas əhali qrupuna aid edilən ailələrin üzvü olan tələbələrin 2020-ci ildə təhsil haqqı xərcləri dövlət büdcəsi hesabına ödənəcək. Bu sıraya ünvanlı dövlət sosial yardımı alan ailələrin üzvü olan; hər iki valideyni (tək valideyni olduqda isə həmin şəxs) və ya qanuni nümayəndələri I və II dərəcə əlilliyi olan, işsiz kimi qeydiyyatda olan, yaşa görə əmək pensiyası və sosial müavinət alan şəxslər aid edilir.
Aprelin 14-də APA-ya açıqlama verən Təhsil Nazirliyinin ictimaiyyətlə əlaqələr sektorunun müdiri Cəsarət Valehov deyib ki, Nazirlər Kabinetinin qərarı 22 min tələbəni əhatə edəcək: “Bu tələbələrin 16500-ü ali təhsil, 4500-ü orta ixtisas, qalanları peşə təhsili müəssisəsində təhsil alır: “Yaxın 20 gün müddətində ali, orta ixtisas və peşə təhsili müəssisələrində oxuyan və sosial həssas qrupa aid ailələrdən olan tələbələrin müəyyən olunması üçün iş aparılacaq.
Qərarın icrası üçün ümumilikdə 40 milyon manat ayrılacaq. Ödəniş 2019-2020-ci tədris ilinin yaz və 2020-2021-ci tədris ilinin payız semestrlərini, yarım illikləri əhatə edəcək”.
Nazirlər Kabinetinin qərarı ilə bağlı şərh yayan iqtisadçı Qubad İbadoğlu isə yazır ki, 2020-ci il yanvarın 1-nə 72,2 min aztəminatlı ailənin 298,9 min üzvü ünvanlı dövlət sosial yardımı alıb, yaşa görə əmək pensiyası alanların sayı 742 min nəfər, yaşa görə müavinət alanların sayı 82,4 min nəfər, əlilliyə görə müavinət alanların sayı 180,5 min nəfər olub.
